“MİNAHACK” hakatonundan minatəmizləmə işinə töhfə
Azərbaycan Dövlət İqtisad Universitetində (UNEC) Müdafiə Sənayesi Nazirliyinin Elmi-Tədqiqat İnstitutunun (ETİ) və Azərbaycan Minatəmizləmə Agentliyinin (ANAMA) tərəfdaşlığı ilə “MİNAHACK” hakatonunun yekun tədbiri keçirilib.
UNEC-dənAZƏRTAC-a bildirilib ki, “Heydər Əliyev İli”nə həsr olunan “MİNAHACK” hakatonunun məqsədi Azərbaycanın işğaldan azad olunan iqtisadi rayonlarında minatəmizləmə işlərinin sürətli aparılmasına, torpağın minalardan təmizlənməsinə texnoloji ideyalar və həllər təklif etmək olub. İki gün davam edən hakatonda 12 universitet və elmi-tədqiqat institutunun 9 komandası iştirak edib.
Universitetin rektoru professor Ədalət Muradov Qarabağın minalardan təmizlənməsi üçün yeni yanaşmalara, müasir texnologiyaların tətbiqinə ehtiyac olduğunu bildirərək problemin həllinə məhz gənclərin töhfə verə biləcəklərindən əminliyini ifadə edib: “Müasir texnologiyaların inkişafı imkan verir ki, bu günə qədər tətbiq edilməyən yanaşmaların reallaşmasına imza ataq. Bu baxımdan gənclərimizə güvənirik və əminəm ki, problemin həllini məhz gənclər təqdim edəcəklər”.
Ə.Muradov hakatonda Qarabağ qazilərinin və UNEC-lə yanaşı, digər ali təhsil müəssisələrinin tələbələrinin iştirakını xüsusi məqam kimi vurğulayıb.
Müdafiə Sənayesi Nazirliyi ETİ-nin direktoru professor Mürsəl Əliyev layihə ilə bağlı işlərin davam etdiriləcəyini, bu istiqamətdə xarici ölkələrin elmi-tədqiqat institutları ilə əməkdaşlıq əlaqələrinin qurulacağını diqqətə çatdırıb.
“Bank of Baku”nun İdarə Heyətinin sədri Yunus Əmrə Filizoğlu təqdim olunan layihələrin Vətənə xidmət, daha yaxşı gələcək naminə olduğunu deyib.
Çıxışlardan sonra qalib komandalar açıqlanıb. Birinci yerin sahibi “Dianon radiometri” layihəsi olub. Layihə əsasında hazırlanan cihaz vasitəsilə ərazidə yerləşdirilmiş partlamamış sursatların və minaların tərkibində olan partladıcı maddələri aşkar etmək mümkün olacaq.
Qaliblər kubok, hədiyyələr və pul mükafatı əldə ediblər. Hakatonda iştirak edən digər komandalara isə sertifikatlar təqdim olunub.
